رشحاتِ قلم : حضرت مولانا عبدالعلیم فاروقی رحمت اللہ علیہ
جمع و ترتیب :مولانا محمد یامین قاسمی مبلغ دارالعلوم دیوبند
ناشر : ادارۃ الصدیق ، نزد مدنی مسجد دیوبند
صفحات : 96 قیمت ، 70 روپے اشاعت: 1446 ہجری مطابق 2024 عیسوی
رابطہ : 44 14 11 12 94
تعارف نگار: اشتیاق احمد قاسمی ، مدرس دارالعلوم دیوبند
اس کتاب میں حضرت مولانا عبد العلیم فاروقی رحمۃ اللہ علیہ کے ان مضامین کو جمع کیا گیا ہے ، جو مختلف موقع سے ماہ نامہ ” ندائے سنت "میں شائع ہوئے تھے ، اس کتاب میں یہودیوں کی اسلام دشمنی کو کھولا کیا گیا ہے ، یہودیوں نے اسلام کی مخالفت اول دن سے کی ہے ، جب رسول اللہ صلی اللہ علیہ وسلم مکہ مکرمہ سے ہجرت کر کے مدینہ طیبہ تشریف لائے تو یہودیوں نے اسلام کے مٹانے کی بڑی کوششیں کیں ، یہاں تک کہ رسول اللہ صلی اللہ علیہ وسلم کے قتل کی سازش کی ، دینی محاذ پر بھی اور سیاسی محاذ پر بھی اسلام کی مخالفت کی ، یہ جھوٹے وعدے کر لیا کرتے تھے کہ ہم مشرکین کا ساتھ نہیں دیں گے ، مسلمانوں اور اہلِ مدینہ کا ساتھ دیں گے ، مگر خفیہ طور پر یہ مشرکین سے جا کر مل جاتے تھے اور اسلام مخالف سازشوں میں ان کا ساتھ دیتے تھے ۔
عبداللہ ابن سبا یہودی جو یمن کا رہنے والا تھا ، اس نے حضرت عثمان غنی رضی اللہ تعالی عنہ کی خلافت کے زمانے میں منافقانہ طور پر ایمان قبول کر لیا ، پھر حضرت عثمان رضی اللہ تعالی عنہ کے خلاف لوگوں کو بدگمان کرنے کی سازش شروع کی ، صحابۂ کرام کی اولاد کو حضرت کی خلافت سے بدگمان کیا اور ان کو ورغلایا اور یہ سازش حضرت عثمان رضی اللہ تعالی عنہ کی شہادت پر منتج ہوئی ۔ مذہبی محاذ پر اس نے شیعت کی بنیاد رکھی ، مسلمانوں کے بنیادی عقیدے توحید ، رسالت ، ختمِ نبوت وغیرہ سے متعلق مختلف قسم کے عقیدے گڑھے ، لوگوں کو اس نے کہا کہ عیسی علیہ السلام واپس آئیں گے ، لیکن محمد رسول اللہ صلی اللہ علیہ وسلم واپس نہیں ائیں گے یہ تو عجیب بات ہے ، اس طرح اس نے ” رجعت” کے عقیدے کی بنیاد رکھی ، بعض لوگوں نے اس عقیدے کو مان بھی لیا ، اس نے یہ کہا کہ ہر نبی کا ایک وصی ہوتا ہے ۔ رسول اللہ صلی اللہ علیہ وسلم کے وصی حضرت علی رضی اللہ تعالی عنہ ہیں ، حضور ” خاتم الانبیاء "ہیں اور حضرت علی "خاتم الاوصیاء” ہیں ۔ حضرت علی رضی اللہ تعالی عنہ کے خدا ہونے کا عقیدہ بھی یہ رکھتا تھا ، بہت سمجھانے کے باوجود بھی جب نہیں مانا تو حضرت علی رضی اللہ تعالی عنہ نے خندق کھودوا کر آگ میں ڈلوا دیا ، شیعیت کے لیے نبوت کے مقابلے میں ” امامت” کا عقیدہ گڑھا ، سارے ائمہ کو” معصوم "بتایا اور سب کو” علم غیب” کا حامل بتایا، سارے ائمہ کو "مختارِ کل ” بتایا ،بلکہ امامت کو نبوت سے بڑھ کر بتایا صحابۂ کرام رضی اللہ عنہم پر "طعن و تشنیع "کو رواج دیا ۔
مرتب محترم نے اس مجموعے میں ان سارے مضامین کو اکٹھا کیا ہے ، جن میں دلائل سے گفتگو کی گئی ہے ، یہ مجموعہ قارئین کے لیے مفید ہے ، اللہ کرے کہ یہ کام آگے بڑھے اور حضرت مولانا فاروقی کی دوسری مفید تحریریں بھی شائع ہو کر قارین کی آنکھوں کا سرمہ بنیں!
